Deixamos de tratar con monos e pasamos a falar dalgunhas palabras moi comúns no idioma galego e na literatura. Tamén a cultura galega foi achegando orixinais designacións, únicas no eido animal.
Se dicimos vaca, nada de orixinalidade lingüística galega atopariamos neste termo tan importante para os galegos. Da importancia da vaca faláronnos entre outros Castelao ou Manuel Rivas co seu "Un millón de vacas". Mais os nosos gandeiros e labregos aparte de buscarlles nomes tan poéticos como pomba, marela, ratina, luceira, etc., empregaron cuxa ou xovenca; forma esta procedente do latín "iuvenca", o que nos leva a emparentala con "iuvenis"
( xove ). En realidade, a xovenca é unha vaca nova, xove.
Son netamente galegos elementos do mundo animal como vagalume, tamén denominado popularmente coa expresión "unha vella facendo o caldo". As persoas que andaban de noite polas corredoiras e escuros camiños da Galicia rural contemplaban aquelas sinistras luces nas silveiras, íanse atopando con vellas co caldo ao lume no seu pote, eran os vagalumes.
Son tamén moi galegos outros noves de aves como: vencello, vichelocrego ou oureol, laverca ou mazarico; este último cunha etimoloxía curiosa "marcico", relacionado co mes de marzo, mes no que máis se estima o seu canto.
Hai animais cun significado mítico e outros cunha clara relación con crenzas e supersticións tradicionais; uns cunha proxección máis xeral coma o unicornio, quetzal, pitón, medusa, dinosauro, fauno; e outros cunhas claras raigañas galegas coma vacaloura ou curuxa por poñer dous exemplos claros.
O unicornio procede do latín "unicorne"; fai referencia a ese mítico ser tan buscado noutrora pola crenza de que no interior do seu corno existían substancias que subsanaban o problema da impotencia masculina. Atribuíanselle propiedades afrodisíacas.
O azteca "quetzalli", pluma fermosa;deixounos a palabra quetzal para referírmonos a esa ave tropical de plumaxe moi vistosa e considerada sagrada polos indios americanos.
A pitón é outro ser con connotacións mitolóxicas, se nos centramos na súa etimoloxía grega "python" (serpe mitolóxica vencida polo deus Apolo). Malia o temor que causa este réptil polo seu tamaño cómpre destacar que non é velenosa.
Os dinosauros son tamén seres lendarios. O nome destes xigantescos réptiles da era secundaria procede do grego "deinos" ( terrible ) máis "sauros" ( lagarto ).
Do mar regalounos o grego "medusa" (monstro mitolóxico con moita cabeleira e figura de muller) ; de aí que por semellanza se denominase así ao celentéreo con umbrela e longos tentáculos.
Para mencionar colectivamente ao conxunto de animais dun ecosistema empregamos a palabra fauna; fauna mariña, terrestre, etc. Fauna ten unha explicación tamén mitolóxica que nos chega do latín "faunu" ( deus mitolóxico romano dos campos e das selvas con torso e cabeza de home e o resto do corpo de cabra ).